Romssa fylkkasuohkana erenoamášráđđeaddi, Odd Gaare. Hanne Lille/Troms fylkeskommune.

Romssa fylkkasuohkana erenoamášráđđeaddi Odd Gaare, guorahallá "Samisk i den videregående opplæringen i Troms" nammasaš čállosis lagabui mo oahpahushálddašeapmi bargá sámegieloahpahusain, ja guđe fáktorat váikkuhit mearrádusaide mat dahkkojit.

Dutkan fylkkasuohkana dárbbuid vuođul

Doavttergráda lea čađahuvvon almmolaš suorggi ph.d. ortnega mielde, mii galgá nannet dutkanmáhtu almmolaš doaimmain ja addit máhtu mii sáhttá geavahit njuolga geavahusas.

Prošeakta ovddiduvvui danin go Romssa fylkasuohkan háliidii eanet máhtu iežas sámi oahpahusa hálddašeami birra. Bohtosat huksejit viidáseappot fylkkasuohkana guhkesáiggi barggu nannet joatkkaskuvlla sámi oahpahusa.

Romssa fylkkasuohkana fylkkaoahpahushoavdda leamašan ohcci, prošeaktaovddasvástideaddji ja váldooasi ruhtadan. Fylkkaoahpahushoavdda veahkki Bjørn-Inge Thomasjord leamašan prošeaktajođiheaddji, ja erenoamášráđđeaddi Raimo Valle leamašan fylkasuohkana virggálaččat nammaduvvon rávvejeaddji.

Čalmmustahttá máhtu ja fámu

Dutkkus váldá vuolggasaji Gaare iežas vásáhusain oahpahusbyrokráhtan ja fylkkadiggedieđáhusain "Samisk i den videregående opplæringen i Troms" bargguin.

Son guorahallá mo máhtolašvuohta šaddá hálddahusas, gii beassá váikkuhit mearrádusaide, ja mo iešguđetlágan politihkalaš mihttomearit sáhttet čujuhit iešguđetge guvlui. Dutkamuš geahčada maid mo nationála sámepolitihkka, oahpahuspolitihkka ja regionála hálddašeapmi doibmet ovttas.

Mihttomearrin lea váikkuhit eanet máhttovuđot mearrádusaide ja eanet reflekšuvdna fylkkasuohkana sámegielaoahpahusa bargui. Seammás addá dutkan ođđa ipmárdusa álgoálbmotpolitihka, oahpahusa ja almmolaš hálddašeami gaskavuođaid.

Máhttu mii galgá juhkkojuvvot

Dehálaš oassi almmolaš suorggi ph.d.-ortnegis lea ahte dutkan galgá boahtit ávkin sihke iežas doibmii ja servodahkii. Danin Odd Gaare háliida bovdet fágalaš digaštallamii daid bohtosiid ja fáttáid birra mat ovdanbohtet nákkosgirjjis.

Dutkosa sáhttá lohkat ja viežžat dáppe: Nasjonalt vitenarkiv. 

Samisk i den videregående opplæringen i Troms - Nasjonalt vitenarkiv