Filmmas oažžu bátnedivššár Elle Sárá Gaup Oskal veahki guovtti unna ustibiin ja ovttas ságastallet bániid, bátnedearvvašvuođa, karies, bátnegeahčastagaid ja borramuša birra.– Mánát čohkkájedje jaska, ja sii ledje sihke veahá balus ja čaibme - juste nugo mun doaivvun, muitala Málatvuomi bátnedivššár Elle Sárá Gaup Oskal.
Son ieš oassálastá dan ođđa filmmas mii lea sámi mánáid várás. Son lei ge gii fuobmái filmma ráhkadit ja sus lea leamašan váldoovddasvástádus prošektii.
– Mun ožžon jurdaga dalle go leimmet covid-19-dávdda vuolde klinihkas. Háliidin ráhkadit dakkára maid sáhtášii geavahit bátneoahpahusas, ja maid lei álki ieš geavahit pandemiija áigge go eat sáhttán galledit skuvllaid. Lihkus pandemiija nogai ovdal go filbma gearggai. Mus lea sámegiella eatnigiellan, nu lei ge lunddolaš ráhkadit filmma sámegillii.
Movtivašuvdna iežas eatnigillii
Filmmas oažžu bátnedivššár Elle Sara veahki guovtti unna ustibiin ja ovttas ságastallet bániid, bátnedearvvašvuođa, karies, bátnegeahčastagaid ja borramuša birra. Ságastallan lea davvisámegillii, dahká mánáide álkit muitit sisdoalu.
– Lea dehálaš ahte maiddái sámi mánát ožžot máhtu bátnedearvvašvuođa birra iežaset eatnigillii, dutkan čájeha ahte daid dieđuid maid mánát gullet eatnigillii, sihke áddejit ja muitet buorebut. Mánát maiddái nákcejit ságastallat fáttáid birra gaskaneaset buorebut. Dasa lassin illudahttá dat maid unnoraččaid ja stuorábuččaid váimmuid, muitala Gaup Oskal.
Bátnedivššárin oaidná son maiddái ahte mánát ožžot ollu movttiideami iežaset birrasis.
– Jus lagamuččain lea buorre miellaguoddu ja buorit rutiinnat bátnedearvvašvuođa oktavuođas, de dávjá leat mánáin maid nu. Dasa lassin vásihan ahte positiiva vuogit movttiidahttet mánáid eanet go áitagat ja balddáhallat. Oaivvildan ahte bátnedikšun berre leat mielladeaddu, dát addá buori vejolašvuođaid fuolahit iežaset bániid olles eallinagi.
Bátnedearvvašvuođa filbma "Dearvvaš mojit - Frisk smil" lea ráhkaduvvon Sámedikki doarjagiin, ja dan sáhttet buohkat geat háliidit geahččat YouTube neahttasiiddus.