Eira lea oallugiidda oahpis Gabba joavkku njunušjuoigin, mas árbevirolaš luohti lea seaguhuvvon norgalaš álbmotmusihkain ja máilmmimusihkain nu ahte šaddá earenoamáš musikálalaš ovdanbuktin.

Ollu jagiid čađa lea Eira sajáiduvvan dovddus juoigin ja kulturgaskkusteaddjin. Sus lea nana beroštupmi seailluhit, viidásetfievrridit ja gaskkustit árbevirolaš luođi ođđa buolvvaide.

– 1999 rájes, go Inga Juuso virgáduvvui riikaoassemusihkkárin luođis, lea fylkkasuohkanis leamaš dat virgi mii gohčoduvvo "fylkesjoiker". Dát virgi lea leamaš dehálaš veahkkin oainnusmahttit ja ovddidit sámi musihka ja luođi riikkaoasis. John André Eira virgádeapmi čájeha ahte fylkkasuohkan joatká dán dehálaš barggu hui buori vuogi mielde ovddasguvlui, dadjá fylkkasátnejođiheaddji Kristina Torbergsen.

Romssa fylkkasuohkan lea hui duhtavaš go Eira lea lohpidan álgit dán virgái. Fylkkasuohkan vuordá ahte riikkaoassemusihkkárortnet oktan Eirain lea mielde fállamin guovllu álbmogii áidnalunddot musihkalaš vásáhusaid boahtteáiggis.

Virggi birra muitala John André Eira ieš; –Lea stuora gudni beassat leat mielde Riikkaoassemusihkkárortnegis, ja mun illudan sakka dan guovtti jagáš áigodahkii go beasan leat mielde juohkimin juoiganilu min iežamet riikkaoasis, juogo akto dahje ovttas čeahpes bargoskihpáriiguin.