Fysalaš doaibmabijut čázádagain mat sáhttet váikkuhit guliid ja eará sáivačáhceorganismmaid buvttadanvejolašvuođaide gáibidit ahte lea ožžon lobi fylkkagielddas dahje fylkkamánnis, láhkaásahusa bokte mii gullá fysalaš doaibmabijuide čázádagain.
Fylkkagielddain lea ovddasvástádus doaibmabijuin čázádagain dahje osiin čázádagain gos eai leat anadroma luossaguolit dahje reabbáeallit. Jus dan guoskevaš gaskkas leat sáivačáhceguolle-šlájat dahje máddodagat maidda fylkkagielddas ii leat hálddašanovddasvástádus, de galget mearrádusat dahkkot ovttas fylkkamánniin.
Láhkaásahus mii gullá fysalaš doaibmabijuide čázádagain, § 1 (Gielddus álggahit doaibmabijuid čázádagain)
Lea lobiheapme álggahit doaimmaid jus ii leat ožžon lobi fylkkamánnis dahje fylkkagielddas:
- fysalaš doaibmabijut mat mielddisbuktet dahje sáhttet mielddisbuktit ahte guliid dahje eará sáivačáhceorganismmaid laskanvejolašvuođat hedjonit,
- fysalaš doaibmabijut čázádagain ja čázádagaid guora, nu mo hukset lasáid, goaivut guollerokkiid ja bidjat stuorát geđggiid čáhcái vai goddigoahtá eanet guliid báikkis dahje sirdá guollesálaža eará báikái čázádagas, ja
- fysalaš doaibmabijut anadroma luossaguliide dahje sáivačáhceguliide man ulbmilin lea rievdadit ovtta dahje máŋgga šlája produkšuvnna, máddodatsturrodaga dahje lávdama.
Gielddus a ja b mielde gusto beroškeahttá doaibmabiju ulbmilis. Gielddus a ja b mielde ii gusto jus doaibmabidju gáibida doaibmalobi čázádatregulerenlága dahje čáhceresursalága bokte.
Fylkkamánnis lea ovddasvástádus doaibmabijuide daid čázádagain gos leat anadroma luossaguolit dahje reabbáeallit.
Oza lobi fysalaš doaibmabijuide čázádagain
Fylkkagielda lea ráhkadan ohcanskovi čalmmustahttin dihte guđe dieđuid lea dárbbašlaš addit go ohccojuvvo lohpi láhkaásahusa bokte mii gullá fysalaš doaibmabijuide čázádagain. Doaibmabijut čázádagain gos eai leat anadroma luossaguolit dahje reabbáeallit sáddejuvvojit čujuhussii:
postmottak@tromsfylke.no dahje Romssa fylkkasuohkan, Poastaboksa 6600, 9296 Tromsø - Romsa.
Dáppe gávnnat ohcanskovi (DOCX, 196 kB)